ഞായർ പകൽ 11ന് എയർ ആംബുലൻസിൽ കണ്ണൂരിലെത്തിക്കുന്ന മൃതദേഹം തലശേരി ടൗൺഹാളിൽ പൊതുദർശനത്തിന്‌ വയ്‌ക്കും. തുടർന്ന് കോടിയേരി മാടപ്പീടികയിലെ വസതിയിൽ തിങ്കൾ രാവിലെ 10 വരെ പൊതുദർശനം. രാവിലെ 11 മുതൽ സിപിഐ എം ജില്ലാ കമ്മിറ്റി ഓഫീസായ അഴീക്കോടൻ മന്ദിരത്തിലെ പൊതുദർശനത്തിനുശേഷം പകൽ മൂന്നിന്‌ പയ്യാമ്പലത്ത്‌ സംസ്‌കരിക്കും. ആദരസൂചകമായി തലശേരി, ധർമടം, കണ്ണൂർ മണ്ഡലങ്ങളിൽ തിങ്കളാഴ്‌ച ഹർത്താൽ ആചരിക്കും.
പാർടി സംസ്ഥാന സെക്രട്ടറിയായിരുന്ന അദ്ദേഹം ആഗസ്‌ത്‌ അവസാനമാണ്‌ സ്ഥാനമൊഴിഞ്ഞ്‌ ചികിത്സയ്‌ക്കായി ചെന്നൈയിലേക്ക്‌ തിരിച്ചത്‌. കണ്ണൂർ ജില്ലയിലെ തലശേരിയിൽ കുഞ്ഞുണ്ണി കുറുപ്പിന്റെയും നാരായണിയമ്മയുടെയും മകനായി 1953 നവംബർ 16ന് ആയിരുന്നു കോടിയേരിയുടെ ജനനം. വിദ്യാർഥിയായിരുന്നപ്പോൾത്തന്നെ രാഷ്ട്രീയത്തിൽ സജീവമായി. എസ്എഫ്ഐ സംസ്ഥാന സെക്രട്ടറി, അഖിലേന്ത്യ ജോയിന്റ്‌ സെക്രട്ടറി, ഡിവൈഎഫ്‌ഐ കണ്ണൂർ ജില്ലാ പ്രസിഡന്റ്, സിപിഐ എം കണ്ണൂർ ജില്ലാ സെക്രട്ടറി എന്നീ ചുമതലകൾ വഹിച്ചു. അടിയന്തരാവസ്ഥക്കാലത്ത്‌ പൊലീസിന്റെ ക്രൂരമർദനത്തിന് ഇരയായി. മിസ തടവുകാരനായി 16 മാസം ജയിലിൽ കഴിഞ്ഞു
സിപിഐ എം നേതാവും തലശേരി എംഎൽഎയുമായിരുന്ന എം വി രാജഗോപാലിന്റെ മകൾ എസ് ആർ വിനോദിനിയാണ്‌ ഭാര്യ. മക്കൾ: ബിനോയ്‌ കോടിയേരി, അഡ്വ. ബിനീഷ്‌ കോടിയേരി. മരുമക്കൾ: ഡോ. അഖില, റിനീറ്റ.
Read more: https://www.deshabhimani.com/news/kerala/kodiyeri-balakrishnan/1047197
സ്വതന്ത്ര ഇന്ത്യയിലെ ജനാധിപത്യ കശാപ്പിന്റെ ആ പ്രഖ്യാപനം 1975 ജൂൺ 26ന് അർധരാത്രിയിലാണ്. മണിക്കൂറുകൾക്കകം പ്രതിഷേധവുമായി കേരളത്തിലെ വിദ്യാർത്ഥി പ്രസ്ഥാനം രംഗത്തുവന്നു. തിരുവനന്തപുരം യൂണിവേഴ്സിറ്റി കോളേജ് വിദ്യാർത്ഥിയും എസ്എഫ്ഐ സംസ്ഥാന സെക്രട്ടറിയുമാണ് അന്ന് ഞാൻ. എം എ ബേബി പ്രസിഡന്റും.
28ന് കോഴിക്കോട്ട് എ കെ ജി പങ്കെടുക്കുന്ന സിപിഐ എം പ്രവർത്തക യോഗത്തിൽ സംബന്ധിക്കാൻ തിരുവനന്തപുരത്തുനിന്നും 27ന് നാട്ടിലെത്തിയതാണ്. അന്നുതന്നെ ചിറക്കര ഹൈസ്‌കൂളിനു മുമ്പിൽ നടന്ന പ്രതിഷേധയോഗത്തിൽ സംസാരിച്ചു. അടിയന്തരാവസ്ഥയ്ക്കെതിരെ സംസ്ഥാന വ്യാപകമായി പഠിപ്പുമുടക്കിനു ആഹ്വാനം ചെയ്തു. വീട്ടിലെത്തി പിറ്റേന്ന് കോഴിക്കോട്ടേക്കു പോകാനുള്ള തയ്യാറെടുപ്പിൽ ഉറങ്ങാൻ കിടന്നു. അർധരാത്രിയോടെ വാതിലിൽ തുടരെയുള്ള മട്ടുകേട്ടാണ് ഉണർന്നത്. വാതിൽ തുറന്നപ്പോൾ തലശേരി എസ്ഐയുടെ നേതൃത്വത്തിൽ വൻപൊലീസ് സംഘം വീടുവളഞ്ഞിരിക്കുന്നു. അപ്പോൾ തന്നെ അറസ്റ്റ് ചെയ്തു. ഭീകരാന്തരീക്ഷം സൃഷ്ടിച്ചു ചുറ്റുവട്ടത്തുമുള്ള നൂറുകണക്കിനുപേരെ ഇതുപോലെ പിടിച്ചുകൊണ്ടുപോയിരുന്നു.
സംസ്ഥാനത്തിന്റെ വിവിധഭാഗങ്ങളിൽനിന്നും ഒട്ടേറെ സഖാക്കളെ അറസ്റ്റുചെയ്‌തു. അടിയന്തരാവസ്ഥക്കെതിരെ പഠിപ്പുമുടക്കിനു ആഹ്വാനം ചെയ്‌തതാണ് എന്നെ അറസ്റ്റുചെയ്യാൻ പൊലീസിനെ പ്രകോപിപ്പിച്ചത്. നിങ്ങളുടെ വിദ്യാഭ്യാസം അവസാനിപ്പിക്കുമെന്നും ഒരുകാലത്തും പുറത്തുവരാൻ കഴിയില്ലെന്നും തലശേരി സ്റ്റേഷനിൽവച്ച് എസ്ഐ ഭീഷണിമുഴക്കി. അടിയന്തരാവസ്ഥക്കെതിരായ ആദ്യ പ്രതികരണമായതിനാലാണ് സംഘടനയെ സർക്കാർ നോട്ടമിട്ടത്. ആദ്യം അറസ്റ്റിലായവരിൽ എസ്എഫ്ഐ നേതാക്കളായിരുന്നു കൂടുതൽ. തുടർന്നു പഠിപ്പുമുടക്ക്, സംസ്ഥന സെക്രട്ടറിയെ അറസ്റ്റുചെയ്തിലുള്ള പ്രതിഷേധവുമായി മാറിയതോടെ കേരളത്തിലെ വിദ്യാർത്ഥി പ്രസ്ഥാനം അടിയന്തരാവസ്ഥക്കെതിരായ വിട്ടുവീഴ്ചയില്ലാത്ത പോരാട്ടത്തിനു ധീരമായ തുടക്കം കുറിക്കുകയായിരുന്നു.
പത്രങ്ങൾക്കു സെൻസർഷിപ്പ് ഏർപ്പെടുത്തിയിരുന്നെങ്കിലും വിദ്യാർത്ഥി നേതാക്കളെ അറസ്റ്റുചെയ്ത വാർത്ത ദേശാഭിമാനിയിൽ വന്നതോടെ പത്രത്തെ പ്രീ സെൻസർഷിപ്പിനു വിധേയമാക്കി. തുടർന്ന് പല ദിവസങ്ങളിലും എഡിറ്റോറിയൽ കോളം ഒഴിച്ചിട്ട് പ്രസിദ്ധീകരിച്ചു. പൊലീസ് സ്റ്റേഷനിൽ പാർടി നേതാക്കൾ കാണാനെത്തി. തുടർന്ന് അർധരാത്രിയോടെ വിട്ടയക്കുകയും ചെയ്തു. പുറത്തുവന്നശേഷം കൊച്ചിയിൽ വിളിച്ചുചേർത്ത എസ്എഫ്ഐ സംസ്ഥാന കമ്മിറ്റിയോഗത്തിൽ വിദ്യാർത്ഥി പ്രസ്ഥാനം ഏറ്റെടുക്കേണ്ട കടമകൾക്കു രൂപം നൽകി.
സർക്കാരിന്റെ ഏകാധിപത്യ നടപടികൾക്കെതിരെ പരസ്യ പ്രവർത്തനം നടത്താൻ എം എം ബേബി, എം വിജയകുമാർ, ജി സുധാകരൻ എന്നിവരെയും രഹസ്യ പ്രവർത്തനങ്ങൾക്കു എന്നെയും സംസ്ഥാന കമ്മിറ്റി ചുമതലപ്പെടുത്തി. പരസ്യ പ്രവർത്തനത്തിന്റെ ഭാഗമായി കേളേജുകളിൽ നടത്തിയ ധർണയും പ്രകടനങ്ങളും അടിച്ചൊതുക്കാനാണ് പൊലീസ് ശ്രമിച്ചത്. തിരുവനന്തപുരത്ത് പ്രകടനം നടത്തിയവരെ അതിഭീകരമായി മർദിച്ചു. വിദ്യാർത്ഥി മുന്നേറ്റത്തെ എങ്ങനെയും തടയുകയായിരുന്നു ഉദ്ദേശ്യം. പലരെയും അറസ്റ്റുചെയ്ത് ജയിലിലടച്ചു. സംസ്ഥാന സെക്രട്ടറി എന്ന നിലയിൽ ഞാൻ മാത്രമാണ് പുറത്തുണ്ടായത്. വീണ്ടും അറസ്റ്റിലാകുന്നതുവരെയുള്ള രണ്ട് മാസം കേരളത്തിലെ ക്യാമ്പസുകൾ കേന്ദ്രീകരിച്ച രഹസ്യയോഗങ്ങൾ സംഘടിപ്പിച്ച് വിദ്യാർത്ഥികളിൽ സമരവീര്യം ഉയർത്താനുള്ള പ്രവർത്തനങ്ങൾ നടത്തി. അന്ന് പിടിയിലകപ്പെടാതിരുന്നത് സഖാക്കളുടെ ജാഗ്രതകൊണ്ട്.
ഇതിനിടെ പാർടി നേതാക്കളെ മിസ നിയമപ്രകാരം അറസ്റ്റ് ചെയ്യാൻ തുടങ്ങി. എ കെ ജി, ഇ എം എസ് ഉൾപ്പെടെയുള്ളവർ ജയിലിൽ. സെപ്തംബറിൽ തലശേരിക്കടുത്ത് ടെമ്പിൾഗേറ്റിനടുത്തുവച്ച് സഞ്ചരിച്ച ഓട്ടോ നാലുഭാഗത്തുനിന്നുമെത്തിയ പൊലീസ് തടഞ്ഞുനിർത്തി എന്നെയും അറസ്റ്റ് ചെയ്തു. കണ്ണൂർ സ്റ്റേഷനിലെ ലോക്കപ്പിൽ കിടക്കുമ്പോഴാണ് അന്നു കൂത്തുപറമ്പ് എംഎൽഎ ആയിരുന്ന പിണറായി വിജയനെ അറസ്റ്റ്ചെയ്ത് മർദിച്ച് അവശനാക്കി അവിടെ കൊണ്ടുവന്നത്. എപ്പോഴും എന്തും സംഭവിക്കാമെന്ന ഭീകരാന്തരീക്ഷം. ഞങ്ങൾ 16പേരാണ് ലോക്കപ്പിലുള്ളത്. അടിവസ്ത്രം മാത്രം ധരിക്കാനേ അനുവാദമുള്ളൂ. കോടതിയിൽ ഹാജരാക്കാതെ കണ്ണൂർ സെൻട്രൽ ജയിലിലേക്കാണ് കൊണ്ടുപോയത്. മിസ പ്രകാരം ജയിലിലടച്ച സംസ്ഥാന സെക്രട്ടറിയെ മോചിപ്പിക്കണമെന്നാവശ്യപ്പെട്ട് വിദ്യാർത്ഥികൾ നടത്തിയ ഒപ്പുശേഖരണത്തിലൂടെ എസ്എഫ്ഐയുമായി ബന്ധമില്ലാത്തവരെ കൂടി പ്രസ്ഥാനത്തിലേക്കു അണിനിരത്താൻ സാധിച്ചു.
മണ്ണാർക്കാട് എംഇഎസ് കേളേജിലെ മുഹമ്മദ് മുസ്‌തഫയും കോഴിക്കോട് എൻജിനിയറിങ് കോളേജിലെ പി രാജനും അന്ന് ക്രൂരമർദനത്തിനിരയായി കൊല്ലപ്പെട്ടു. അതിനെതിരെ പ്രതിഷേധം ശക്തിപ്പെടുത്താനും മുഖ്യമന്ത്രിയായിരുന്ന കെ കരുണാകരനെ അധികാരത്തിൽനിന്നിറക്കാനുമുള്ള സമരത്തിനു നേതൃത്വം നൽകാനും കഴിഞ്ഞത് വിദ്യാർത്ഥി പ്രസ്ഥാനത്തിന്റെ പോരാട്ട ചരിത്രത്തിലെ മറക്കാനാവാത്ത അധ്യായം. അടിയന്തരാവസ്ഥ പിൻവലിച്ച് തെരഞ്ഞെടുപ്പ് പ്രഖ്യാപിക്കപ്പെട്ട ദിവസമാണ് 16മാസത്തെ ജയിൽവാസം കഴിഞ്ഞ് ഞങ്ങൾ പുറത്തുവന്നത്. തുടർന്ന് കേരളത്തിലെ കേളേജുകളിൽ വൻസ്വീകരണം ലഭിച്ചു. എസ്എഫ്ഐയുടെ ഉശിരൻ മുന്നേറ്റമാണ് പിന്നീടുള്ള നാളുകളിൽ കാണാനായത്. അതോടെ കേരളത്തിലെ ക്യാമ്പസുകളിൽ കെഎസ്യു കുത്തക തകരുകയായിരുന്നു. അടിയന്തരാവസ്ഥക്കെതിരായ എസ്എഫ്ഐ നേതൃത്വം നൽകിയ ആ പോരാട്ടമാണ് കേരളത്തിലെ വിദ്യാർത്ഥി പ്രസ്ഥാനത്തിനും വഴിത്തിരിവായത്.
No comments:
Post a Comment