കാനഡയില്‍ പോയി കാർഷിക ജോലി ചെയ്യാമോ: മണിക്കൂറിന് 3000 രൂപ ശമ്പളം, എങ്ങനെ ജോലി സ്വന്തമാക്കാം

കേരളത്തില്‍ നിന്നുള്‍പ്പടെ നിരവധി ഉദ്യോഗാർത്ഥികളും വിദ്യാർത്ഥികളുമാണ് ഒരോ വർഷവും കാനഡയിലേക്ക് വിമാനം കയറുന്നത്. വിദ്യാർത്ഥികളായി പോവുന്നവർ പഠനശേഷവും ഏതെങ്കിലുമൊരു തൊഴില്‍ മേഖലയിലേക്ക് പ്രവേശിച്ച് പതിയെ കാനഡയില്‍ പിആർ നേടുകയും ചെയ്യുന്നു. പൊതുവെ ബാങ്കിങ്, ആശുപത്രി, ഹോട്ടല്‍, ഐടി തുടങ്ങിയ മേഖലകളിലാണ് പുറത്ത് നിന്നും എത്തുന്നുവർ തൊഴില്‍ അന്വേഷിക്കുന്നത്.

എന്നാല്‍ മേല്‍പ്പറഞ്ഞവയ്ക്ക് പുറമെ കാനഡയില്‍ നിരവധി തൊഴില്‍ അവസരങ്ങള്‍ നല്‍കുന്ന മറ്റൊരു പ്രധാന മേഖലയാണ് കാർഷിക മേഖല. ഓരോ വർഷവും ആയിരക്കണക്കിന് വിദേശ തൊഴിലാളികളാണ് കാനഡയുടെ കാർഷിക മേഖലയിലേക്ക് എത്തിക്കൊണ്ടിരിക്കുന്നത്. എന്നാല്‍ എന്തുകൊണ്ടോ ഈ മേഖലയിലേക്കുള്ള മലയാളികളുടെ കുടിയേറ്റം വളരെ കുറവാണ്.

മറ്റ് മേഖലയിലേതെന്ന പോലെ കാനഡയിൽ ഒരു കാർഷിക ജോലി ലഭിക്കുന്നത് നിങ്ങളുടെ വരുമാനം വർദ്ധിപ്പിക്കാനും മികച്ച ജീവിത നിലവാരം സ്വന്തമാക്കാനുമുള്ള സാഹചര്യം ഒരുക്കുന്നു. കാർഷിക മേഖല വളർന്നു കൊണ്ടിരിക്കുകയാണെങ്കിലും, കാനഡയിൽ കാർഷിക തൊഴിലാളികളുടെ ഗണ്യമായ കുറവ് നേരിടുന്നു. ഫാമുകളിലോ നഴ്സറികളിലോ ഹരിതഗൃഹങ്ങളിലോ നടത്തുന്ന പ്രാഥമിക കൃഷി, കാനഡയുടെ ജിഡിപിയുടെ 1.6 ശതമാനം സംഭാവന ചെയ്യുകയും 241,500-ലധികം ആളുകൾക്ക് തൊഴിൽ നൽകുകയും ചെയ്യുന്നുണ്ട്.

നിലവിലെ 40 ശതമാനത്തിലധികം കർഷകത്തൊഴിലാളികൾ 2033-ഓടെ ഈ തൊഴില്‍ രംഗം വിട്ടേക്കുമെന്നാണ് റിപ്പോർട്ടുകള്‍ വ്യക്തമാക്കുന്നത്. സമീപകാല റിപ്പോർട്ട് അനുസരിച്ച്, കാർഷിക മേഖലയിൽ അടിയന്തിരവും അവശ്യവുമായ റോളുകൾ നികത്താൻ കാനഡയ്ക്ക് 30,000 കുടിയേറ്റക്കാരെയെങ്കിലും ആവശ്യമുണ്ട്. നിങ്ങൾ കാർഷിക മേഖലയില്‍ പരിചയമുള്ള ഒരു തൊഴിലാളിയാണെങ്കിൽ, കാനഡയില്‍ നിങ്ങള്‍ക്ക് ധാരാളം അവസരങ്ങള്‍ക്ക് വഴി തുറക്കും.

കാനഡയിലെ കാർഷിക മേഖലയിൽ അവസരങ്ങൾക്ക് കുറവില്ലെങ്കിലും, പ്രത്യേക പ്രവിശ്യകളിൽ ചില റോളുകൾക്കുള്ള ഡിമാൻഡ് കൂടുതലായിരിക്കാം. ഉദാഹരണത്തിന് അഗ്രികള്‍ച്ചർ സർവീസ് കോണ്‍ട്രാക്ടേഴ്സ് ആന്‍ഡ് ഫാം സൂപ്പർവൈസേഴ്സ് എന്ന തസ്തികതയില്‍ ഏറ്റവും കൂടുതല്‍ ഒഴിവുള്ളത് ഒന്റാറിയോ, മാനിറ്റോബ, നോവ സ്കോട്ടിയ, പ്രിൻസ് എഡ്വേർഡ് ഐലൻഡ്, ക്യൂബെക്ക്, സസ്‌കാച്ചെവൻ പ്രവിശ്യകളിലാണ്.

കന്നുകാലി പരിപാലന മേഖലയില്‍ ആൽബെർട്ട, ഒന്റാറിയോ, നോവ സ്കോട്ടിയ, പ്രിൻസ് എഡ്വേർഡ് ദ്വീപ് എന്നീ പ്രവിശ്യകളിലും സാധാരണ കാർഷിക തൊഴിലാളികള്‍ക്ക് ആൽബെർട്ട, ഒന്റാറിയോ, പ്രിൻസ് എഡ്വേർഡ് ദ്വീപ് എന്നിവിടങ്ങളിലുമാണ് അവസരമുള്ളത്. മത്സ്യം, സമുദ്രോത്പന്ന പ്ലാന്റ് തൊഴിലാളിക്ക് കൂടുതല്‍ അവസരമാവട്ടെ നോവ സ്കോട്ടിയ, പ്രിൻസ് എഡ്വേർഡ് ദ്വീപ് പ്രവിശ്യകളിലുമാണ്.

ഗവൺമെന്റിന്റെ ജോബ് ബാങ്കിലെ കണക്കനുസരിച്ച്, മിക്ക പ്രാഥമിക കാർഷിക ജോലികളുടെയും ശരാശരി വേതനം മണിക്കൂറിന് 16 മുതൽ 18 വരെ ഡോളാറാണ്. അതായത് ഒരു മണിക്കൂറിന് 1,482 വരെ രൂപ ലഭിക്കും. ഒരു ദിവസം എട്ട് മണിക്കൂർ ജോലിയാണെങ്കില്‍ 11856 രൂപ ലഭിക്കും. മാസം 3.5 ലക്ഷത്തോളം രൂപ. അതേസമയം ആപ്പിള്‍ പറിക്കുന്നത് പോലെയുള്ള പല കാർഷിക തൊഴിലുകളും കാലാനുസൃതമാണ്. സീസണ്‍ അല്ലാത്ത സമയങ്ങളില്‍ മറ്റ് തൊഴിലുകള്‍ തേടേണ്ടി വരും.

വിദഗ്ദ്ധ തൊഴിലാളികൾ, ഫാം മെഷിനറി ഓപ്പറേറ്റർമാർ, വ്യവാസായിക രീതിയില്‍ ഇറച്ചി വെട്ടുന്നവർ എന്നിവർക്ക് മണിക്കൂറിൽ 20 മുതൽ 23 ഡോളർ വരെ ശരാശരി വരുമാനം ലഭിക്കും. ( മണിക്കൂറില്‍ 1,894 രൂപ വരെ) ചില ഭാഗങ്ങളിൽ പരിചയസമ്പന്നരായ സ്പെഷ്യലിസ്റ്റുകൾക്ക് മണിക്കൂറിൽ 34 ഡോളർ വരെ ശമ്പളം ലഭിക്കാം. അഗ്രികൾച്ചറൽ മാനേജർമാർക്ക് ചില പ്രവിശ്യകളിൽ മണിക്കൂറിന് 37 ഡോളർ വരെയാണ് ലഭിക്കുന്നത്. അതായത് മണിക്കൂറില്‍ 3047 രൂപ. എട്ട് മണിക്കൂറാണ് ജോലിയെങ്കില്‍ കണക്ക് കൂട്ടുമ്പോള്‍ മാസം ലഭിക്കുന്നത് ഏഴ് ലക്ഷത്തില്‍ അധികം രൂപയുമാണ്.

പല തൊഴിലുടമകളും സീസണൽ കാർഷിക തൊഴിലാളികൾക്ക് താമസസൗകര്യം നൽകുന്നു എന്നതും ശ്രദ്ധിക്കേണ്ടതാണ്. കനേഡിയൻ‌മാർ സാധാരണയായി ഓരോ മാസവും താമസ ചെലവുകൾക്കായി 800 മുതൽ 1,800 വരെ ഡോളർ ചിലവഴിക്കേണ്ടി വരും. അതിനാൽ സൗജന്യ താമസസൗകര്യം കാനഡയിലെ നിങ്ങളുടെ ജീവിതച്ചെലവ് ഗണ്യമായി കുറയ്ക്കും. ഒരു തൊഴിൽ ഓഫർ സ്വീകരിക്കുന്നതിന് മുമ്പ് നിങ്ങൾക്ക് അർഹതയുള്ള ആനുകൂല്യങ്ങളെക്കുറിച്ച് തൊഴിലുടമകളോട് ചോദിച്ച് മനസ്സിലാക്കേണ്ടത് അത്യാവശ്യമാണ്.

കാനഡയിലെ നിലവിലുള്ള കർഷകരിൽ വലിയൊരു ശതമാനം വിരമിക്കുന്നതോടെ വരും വർഷങ്ങളിൽ സ്ഥിതി കൂടുതൽ വഷളാകുമെന്നാണ് പ്രതീക്ഷിക്കുന്നത്. കാർഷിക ജോലികളിൽ കർഷകത്തൊഴിലാളികൾ മാത്രമല്ല, ഗുണനിലവാര നിയന്ത്രണം, പാക്കേജിംഗ്, വിതരണ ശൃംഖല, വിപണനം, ധനകാര്യം തുടങ്ങിയ ജോലികളും ഉൾപ്പെടുന്നുണ്ട്.

ജോബ് ബാങ്ക്, ഫാം ജോബ്‌സ് കാനഡ, മോൺസ്റ്റർ, ഇൻഡീഡ്, ലിങ്ക്ഡ്ഇൻ തുടങ്ങിയ ജോബ് പോർട്ടലുകൾ കാനഡയില്‍ ലഭ്യമായ അവസരങ്ങൾ തേടാനുള്ള മികച്ച പോർട്ടലുകളാണ്. ജോലി മുഴുവൻ സമയമാണോ അതോ സീസണൽ ആണോ, ശമ്പള പരിധി, റോളിനായി നിങ്ങളെ നിയമിച്ചാൽ നിങ്ങൾക്ക് ലഭിക്കുന്ന ആനുകൂല്യങ്ങൾ എന്നിവയും പല വെബ്സൈറ്റുകളും വ്യക്തമാക്കുന്നുണ്ട്.

ഗ്രീൻടെക് റിസോഴ്‌സ് ലിമിറ്റഡ്, അഗ്രികൾച്ചറൽ എംപ്ലോയ്‌മെന്റ് ആൽബർട്ട ലിമിറ്റഡ് എന്നിവ പോലെ കാനഡയിലെ കാർഷിക ജോലികൾക്കുള്ള റിക്രൂട്ട്‌മെന്റിൽ നിരവധി എംപ്ലോയ്‌മെന്റ് ഏജൻസികൾ വൈദഗ്ദ്ധ്യം നേടിയിട്ടുണ്ട്. കാനഡയിൽ, റിക്രൂട്ട്‌മെന്റ് ഏജൻസികൾ ജോലി ഉദ്യോഗാർത്ഥികളിൽ നിന്നോ അപേക്ഷകരിൽ നിന്നോ ഫീസ് ഈടാക്കില്ല എന്നത് ശ്രദ്ധിക്കേണ്ടതാണ്. തസ്തിക നികത്തിക്കഴിഞ്ഞാൽ അവർക്ക് തൊഴിലുടമയിൽ നിന്നാവും ഇതിനുള്ള ശമ്പളം ലഭിക്കുക. അതുകൊണ്ട് തന്നെ വ്യാജ ഏജന്‍സികളുടെ തട്ടിപ്പില്‍ വീഴാതെയും സൂക്ഷിക്കണം.