കിഫ്ബി കേരളത്തിൻറെ കടഭാരം വർദ്ധിപ്പിക്കുമോ..? ആർ രാംകുമാർ എഴുതുന്നു

കിഫ്ബി കേരളത്തിൻറെ കടഭാരം വർദ്ധിപ്പിക്കുമോ? കിഫ്ബിയുടെ കടബാധ്യത തീർക്കൽ സംസ്ഥാന സർക്കാരിൻ്റെ മേൽ വന്ന് പതിക്കുമോ? അങ്ങനെയൊക്കെ സംഭവിക്കും എന്നാണ് ഡോ കെ. പി. കണ്ണൻ അഭിമുഖത്തിൽ പറയുന്നത്. ഒരച്ഛന് രണ്ട് മക്കളുണ്ട്. അതിൽ ഒരാൾ എടുത്ത കടമൊക്കെ കൃത്യമായി വീട്ടുന്നു. പക്ഷേ രണ്ടാമൻ വീട്ടുന്നില്ല. അപ്പോൾ ഒരു പ്രിൻസിപ്പൽ ഏജൻറ് ആയി നിൽക്കുന്ന അച്ഛന് മകൻ്റെ കടം തിരിച്ചടയ്ക്കാൻ ബാധ്യതയുണ്ടാവില്ലേ എന്നതാണ് അദ്ദേഹത്തിൻറെ രസകരമായ ചോദ്യം.

കിഫ്‌ബി എന്ന സംവിധാനത്തിന്റെ ചില അടിസ്ഥാന തത്വങ്ങൾ മനസ്സിലാക്കുന്നത് ഇത്തരം സംശയങ്ങളെ ദൂരീകരിക്കാൻ സഹായിക്കും. ആമുഖമായി, ഒരു ഡിസ്ക്ലൈമർ. ഞാൻ താഴെ കുറിക്കുന്നത് കിഫ്ബിയൂടെ ഔദ്യോഗിക നിലപാട് ആവണമെന്നില്ല.  വ്യക്തിഗതമായി ആ സ്ഥാപനത്തെ പറ്റി പഠിക്കാൻ ശ്രമിച്ചിട്ടുള്ള ഒരാളുടെ നിലപാടുകൾ മാത്രമാണ്.

ആദ്യമായി, 2016-ലൊക്കെ സർക്കാരിൻ്റെ പക്കലുണ്ടായിരുന്ന കിഫ്ബിയുടെ ഒരു പ്രാഥമിക ഋണബാദ്ധ്യതാ വിശകലനം (Liability Assessment) പരിശോധിക്കാം. അന്നുണ്ടായിരുന്ന മതിപ്പ് കണക്കുകളെയാണ് ഇവിടെ ഞാൻ ആദ്യം ഉപയോഗിക്കുന്നത്. യഥാർത്ഥ കണക്കുകളിലേക്ക് അതിന് ശേഷം വരാം. കിഫ്ബിയുടെ ഘടനയും സാധ്യതയും ഉദാഹരണരൂപേണ വിശദീകരിക്കുക മാത്രമാണ് ലക്ഷ്യം. 

കിഫ്ബി വഴി അഞ്ചു വർഷം കൊണ്ട് 50,000 കോടി രൂപ മൂലധന നിക്ഷേപം നടത്തും എന്നാണ് സർക്കാർ 2016ൽ പറഞ്ഞത്. ഇതിനായി വിവിധ ഏജൻസികളിൽ നിന്നും വിദേശത്ത് നിന്നുമൊക്കെ എടുക്കാൻ കഴിയുന്ന വായ്പയെ ആശ്രയിക്കണം. ആദ്യത്തെ വർഷം 5000 കോടി രൂപ വായ്പയെടുക്കാം. രണ്ടാമത്തെ വർഷം 10,000 കോടി രൂപ വായ്പയെടുക്കാം. മൂന്നാമത്തെ വർഷം 20,000 കോടി രൂപ വായ്പയെടുക്കാം. നാലാമത്തെ വർഷം 15,000 കോടി രൂപ വായ്പയെടുക്കാം. അങ്ങനെ മൊത്തം 50,000 കോടി രൂപ രൂപ വായ്പയായി അഞ്ച് വർഷത്തിൽ എടുത്ത് നിക്ഷേപിക്കാം.

ഇങ്ങനെ അഞ്ച് വർഷത്തിൽ എടുക്കുന്ന വായ്പ 15 വർഷം കൊണ്ട് മടക്കി നൽകേണ്ടി വരും എന്ന് അനുമാനിക്കാം. അതെങ്ങിനെ മടക്കി നൽകും? 

ഇതിനായി രണ്ട് പ്രധാന സ്രോതസ്സുകളെ കിഫ്ബിക്ക് ആശ്രയിക്കാൻ കഴിയും. ഒന്നാമതായി, സംസ്ഥാന സർക്കാർ എല്ലാ വർഷവും ബജറ്റിൽ നിന്ന് ഒരു വിഹിതം കൈമാറും. എന്താണീ വിഹിതം? പിരിക്കുന്ന പെട്രോൾ സെസ് മുഴുവനും കിഫ്‌ബിക്ക് കൈമാറും. രണ്ടാമതായി, പിരിക്കുന്ന മോട്ടോർ വാഹന നികുതിയിൽ നിന്ന് ഒരു ഭാഗം കിഫ്ബിക്ക് കൈമാറും -- ആദ്യ വർഷം 10%, രണ്ടാം വർഷം 20%, മൂന്നാം വർഷം 30%, നാലാം വർഷം 40%, അഞ്ചാം വർഷം മുതൽ 50% വെച്ച്. ഇതാണ് ആദ്യത്തെ സ്രോതസ്സ്. മോട്ടോർ വാഹന നികുതിയിൽ നിന്നുള്ള ഇത്തരം കൈമാറ്റം ഏകദേശം 16 ശതമാനം കണ്ട് ഓരോ വർഷവും വളരും എന്നായിരുന്നു തുടക്കത്തിലെ അനുമാനം.

ഇങ്ങനെ സർക്കാരിൽ നിന്നും കിഫ്ബിക്ക് കിട്ടുന്ന പണം ബാങ്കിലോ ധനകാര്യ വിപണിയിലോ നിക്ഷേപിക്കുന്നു. ഈ നിക്ഷേപങ്ങളിൽ നിന്ന് ലഭിക്കുന്ന പലിശയും ലാഭവും കിഫ്ബിക്ക് ഒരു വരുമാനമാണ്. പൂർത്തിയായ കിഫ്ബി പദ്ധതികളിൽ നിന്ന് കിട്ടുന്ന ലാഭവിഹിതങ്ങളും വരുമാനം തന്നെ. ഇതൊക്കെയാണ് രണ്ടാമത്തെ സ്രോതസ്സ്. 

ഇതിനെല്ലാം പുറമേ, സർക്കാർ തുടക്കത്തിൽ നൽകിയ 2498 കോടി രൂപയുടെ ഒരു കോർപ്പസ് ഗ്രാൻ്റും കിഫ്ബിയുടെ കയ്യിലുണ്ട്.

ഈ അനുമാനങ്ങൾ യാഥാർത്ഥ്യമായാൽ 2016-17 മുതൽ 2030-31 വരെയുള്ള കാലയളവിൽ മോട്ടോർ വാഹന നികുതിയുടെ വിഹിതമായും പെട്രോൾ സെസ്സായും മൊത്തം 98,355 കോടി രൂപയുടെ ട്രാൻസ്ഫർ കേരള സർക്കാർ കിഫ്ബിയിലേക്ക് നടത്തിയിട്ടുണ്ടാകും. ഇതാവും കിഫ്ബിയുടെ കയ്യിൽ കടം തിരിച്ചടയ്ക്കാനായി 15 വർഷം കഴിയുമ്പോൾ ബാക്കി ഉണ്ടാവാൻ സാധ്യതയുള്ള തുക. ഇത് എവിടെയെങ്കിലും നിക്ഷേപിച്ചിട്ടുണ്ടെങ്കിൽ ആ പലിശ വരുമാനം വേറെ.

എത്രയാണ് തിരിച്ചടക്കേണ്ടി വരുന്ന കടം? എടുത്തത് 50,000 കോടി രൂപ ആണല്ലോ. ഏകദേശം 9% ആണ് ബോണ്ടുകൾക്ക് മേലുള്ള ശരാശരി പലിശ. അങ്ങനെ വന്നാൽ പലിശയടക്കമുള്ള തിരിച്ചടവ് ഏകദേശം 89,783 കോടി രൂപ. കയ്യിലുള്ളതോ 98,355 കോടി രൂപ. അതായത് 15 വർഷം കഴിയുമ്പോൾ തിരിച്ചടയ്ക്കാൻ വേണ്ടതിനേക്കാൾ കൂടുതൽ പണം കിഫ്ബിയുടെ പക്കലുണ്ടാവും. ഇവിടെ എവിടെയാണ് സർക്കാരിൻറെ കടഭാരം വർദ്ധിക്കുന്നത്? കടം കൂടുന്നേയില്ലല്ലോ!

ഇതായിരുന്നു കിഫ്ബിയുടെ തുടക്കത്തിലെ അടിസ്ഥാന തത്വം. ഇങ്ങനെ വാങ്ങുന്ന കടം കേന്ദ്ര സർക്കാർ സംസ്ഥാനങ്ങൾക്ക് മേൽ അടിച്ചേൽപ്പിക്കുന്ന വായ്പാ പരിധിക്ക് പുറത്ത് നിൽക്കും എന്നും നമുക്കറിയാമായിരുന്നു. അത് കൊണ്ടാണല്ലോ ഇത്തരം ഒരു സ്ഥാപനത്തെ കുറിച്ച് ചിന്തിച്ചത് തന്നെ. ചുരുക്കത്തിൽ, 15 വർഷം കൊണ്ട് മാത്രം നടത്താൻ കഴിയുമായിരുന്ന മൂലധന നിക്ഷേപം അഞ്ച് വർഷം കൊണ്ട് നടത്താം.

ഇനി നമുക്ക് രണ്ടാമത്തെ ഋണബാദ്ധ്യതാ വിശകലനത്തിലേക്ക് വരാം. പ്രധാനപ്പെട്ട ചില അനുമാനങ്ങൾ മുകളിലെ വിശകലനത്തിലുണ്ടായിരുന്നുവല്ലോ. അതിൽ ഏറ്റവും പ്രധാനപ്പെട്ടത് സർക്കാരിൻ്റെ വരുമാനവും (അത് വഴി എല്ലാ വർഷവും കിഫ്ബിക്ക് നൽകുന്ന പണവും) എത്ര കണ്ട് വർദ്ധിക്കും എന്നതിനെ സംബന്ധിച്ചായിരുന്നു. ഒപ്പം യഥേഷ്ടം വായ്പ വിപണിയിൽ നിന്നെടുക്കാം എന്നതും. പക്ഷേ ഇത്തരം അനുമാനങ്ങൾ എപ്പോഴും യാഥാർത്ഥ്യമായി വരണമെന്നില്ല. സംസ്ഥാനത്തിൻറെ വരുമാനം നമ്മൾ അനുമാനിച്ച രീതിയിൽ വളർന്നുവെന്ന് വരില്ല.

അത് തന്നെയാണ് സംഭവിച്ചതും. ദേശീയ തലത്തിലുള്ള സാമ്പത്തിക മാന്ദ്യവും കേരളത്തിലെ പ്രളയം പോലുള്ള പ്രകൃതി ദുരന്തങ്ങളും പിന്നീട് വന്ന കോവിഡ് പ്രതിസന്ധിയും ഒക്കെയാണ് ഇതിന് കാരണമായത്. കിട്ടുന്ന പണമല്ലേ കൈമാറാൻ കഴിയൂ. അതിനാൽ, മോട്ടോർ വാഹന നികുതി വഴിയും പെട്രോൾ സെസ് വഴിയും കൈമാറാൻ കഴിയുമെന്ന് പ്രതീക്ഷിച്ചിരുന്ന അത്രയും തുക കിഫ്‌ബിക്ക് കൈമാറാൻ സർക്കാരിന് കഴിഞ്ഞില്ല. 2023 മാർച്ച് 31 വരെ ഏകദേശം 17,595 കോടി രൂപ മാത്രമാണ് സർക്കാരിന് കിഫ്ബിക്ക് കൈമാറാൻ സാധിച്ചത്.

മാത്രമല്ല, ആഗോള-ദേശീയ സാമ്പത്തിക സാഹചര്യങ്ങൾ മൂലവും കേരളത്തിൽ തന്നെ ഉയർന്നു വന്ന അനാവശ്യ വിവാദങ്ങൾ മൂലവും ഉദ്ദേശിച്ചത്രയും തുക കിഫ്ബിക്ക് വിപണിയിൽ നിന്ന് വായ്പയായി എടുക്കാനും കഴിഞ്ഞില്ല. 2023 മാർച്ച് 31 വരെ 18,579 കോടി രൂപ മാത്രമാണ് വായ്പയായി എടുക്കാൻ കഴിഞ്ഞത്.

ഇവിടെ പറഞ്ഞു പോകേണ്ട ഒരു പ്രധാന കാര്യമുണ്ട്. സർക്കാരിൽ നിന്ന് കിട്ടുന്നതോ, വായ്പയായി എടുക്കാൻ കഴിയുന്നതോ, ആയ തുകകൾ കുറഞ്ഞാൽ ഓട്ടോമാറ്റിക് ആയി തന്നെ കിഫ്ബി നടത്തുന്ന നിക്ഷേപങ്ങളും കുറയ്ക്കപ്പെടും. അത് പോലെ തന്നെ, സർക്കാരിൽ നിന്ന് കിട്ടുന്ന തുക കുറയുന്ന സാഹചര്യം ഉണ്ടായാൽ കിഫ്ബി എടുക്കുന്ന വായ്പയും ഓട്ടോമാറ്റിക് ആയി തന്നെ കുറയ്ക്കപ്പെടും. വായ്പ തിരിച്ചടയ്ക്കാനുള്ള ദീർഘകാല പ്രാപ്തി കണക്കിലെടുത്താണ് എത്ര വായ്പ വാങ്ങണം എന്ന് തീരുമാനിക്കുന്നത് എന്ന് സാരം.)

അപ്പോൾ 2023 മാർച്ച് വരെ കിഫ്‌ബിയുടെ കയ്യിൽ മൊത്തം എത്ര തുക വന്ന് ചേർന്നു? സർക്കാരിൽ നിന്ന് കിട്ടിയതും വായ്പയെടുത്തതും കൂട്ടിയാൽ 36,174 കോടി രൂപ. 

2023 മാർച്ച് വരെ വിവിധ പശ്ചാത്തല വികസന പദ്ധതികൾക്കായി ചിലവഴിച്ച തുകയെത്ര? 23,631 കോടി രൂപ. 2023 ഓഗസ്റ്റ് വരെ ചെലവഴിച്ചത് 26,209 കോടി രൂപ.

അപ്പോൾ കിഫ്ബിയുടെ കയ്യിലുള്ള തുകയെത്രയാവും? 9965 കോടി രൂപ. അതിനൊപ്പം, ഈ തുകയടക്കം എവിടെയെങ്കിലും നിക്ഷേപിച്ചിട്ടുണ്ടെങ്കിൽ അതിൽ നിന്ന് കിട്ടുന്ന പലിശയോ ലാഭമോ. അതിനോടുമൊപ്പം, കിഫ്ബി പൂർത്തീകരിച്ചിട്ടുള്ള പദ്ധതികളിൽ നിന്നുള്ള ലാഭവിഹിതങ്ങൾ ഉണ്ടെങ്കിൽ അതും.

കയ്യിൽ ഏകദേശം 10,000 കോടി രൂപയോളം വച്ചിരിക്കുന്ന ഒരു സ്ഥാപനം സർക്കാരിനെങ്ങനെ കടഭാരമുണ്ടാക്കും? 

ഇനി, കിഫ്ബിയിലേക്ക് പോകുന്ന സർക്കാരിൻ്റെ പണം അനുമാനിച്ച തോതിൽ വളരുന്നില്ല എന്ന് നമ്മൾ പറഞ്ഞുവല്ലോ. ഈ മന്ദഗതിയിലുള്ള വളർച്ച ഇതേ പടി തുടർന്നാലും 2030-31 ആകുമ്പോൾ കിഫ്ബിയുടെ പക്കൽ സർക്കാർ വഴി കിട്ടിയ 40,773 കോടി രൂപ ഉണ്ടാവും എന്നാണ് എൻ്റെ ഒരു ഏകദേശ കണക്ക്. അതിന്മേൽ കിട്ടാൻ സാധ്യതയുള്ള പലിശ വേറെ. അതായത്, ഇന്നത്തെ സാഹചര്യത്തിൽ കിഫ്ബിക്ക് ഏകദേശം 30,000 കോടി രൂപ വരെ വായ്പയെടുക്കാം. മറ്റൊരു രീതിയിൽ പറഞ്ഞാൽ, മുതലും പലിശയുമായി മടക്കി നൽകേണ്ടത് ഏകദേശം 40,000 കോടി രൂപയാകുമ്പോൾ അതിനുള്ളിൽ മുതൽ എത്രയാകുമോ അത്രയും വായ്പ വാങ്ങാം. അത്രയെങ്കിൽ അത്രയെങ്കിലും മൂലധന നിക്ഷേപം നമുക്ക് കിഫ്ബി ഉപയോഗിച്ച് നടത്താം. അങ്ങനെയെടുക്കുന്ന വായ്പയുടെ പലിശയടക്കം തിരിച്ചു കൊടുക്കാൻ വേണ്ടി വരുന്ന തുക സർക്കാർ നൽകിയ വകയിൽ തന്നെ 2031 ആകുമ്പോൾ കിഫ്ബിയുടെ കയ്യിലുണ്ടാവും. അപ്പോൾ എവിടെയാണ് കടഭാരം സർക്കാരിന്മേൽ പതിക്കുന്നത്?

കിഫ്ബി നിയമസഭയ്ക്ക് വിധേയമായല്ല പ്രവർത്തിക്കുന്നത് എന്നും ഡോ കണ്ണൻ പറഞ്ഞ് വെക്കുന്നുണ്ട്. പക്ഷേ എല്ലാ വർഷവും കേരള ബജറ്റിനൊപ്പം കിഫ്ബിയുടെ ഫിഡലിറ്റി റിപ്പോർട്ട് മേശപ്പുറത്ത് വയ്ക്കാറുണ്ട്. മാത്രമല്ല, പലപ്പോഴായി നിയോജക മണ്ഡലാടിസ്ഥാനത്തിൽ, എംഎൽഎ-മാരുടെ സാന്നിധ്യത്തിൽ തന്നെ, അതാത് മണ്ഡലത്തിൽ നടക്കുന്ന കിഫ്ബി പ്രവർത്തികൾ അവതരിപ്പിക്കുകയും ചർച്ച ചെയ്യാറുമുണ്ട്. ഇതിലും കൂടുതൽ എന്തെങ്കിലും ചെയ്യണമെങ്കിൽ അത് ചെയ്യുന്നതിൽ ആ സ്ഥാപനത്തിന് എന്തെങ്കിലും ബുദ്ധിമുട്ട് ഉണ്ടാവും എന്ന് ഞാൻ കരുതുന്നില്ല. 

കിഫ്ബിയുടെ ഭാവിയുടെ കാര്യം എനിക്കോ മറ്റാർക്കെങ്കിലുമോ പ്രവചിക്കാൻ കഴിയും എന്ന് തോന്നുന്നില്ല. വായ്പാ പരിധിയുമായി ബന്ധപ്പെട്ട കേന്ദ്രസർക്കാരിൻ്റെ ഭാവി നയങ്ങളും അതിന്മേൽ സുപ്രീംകോടതി എടുക്കാൻ സാധ്യതയുള്ള നിലപാടുമൊക്കെ കിഫ്ബിയുടെ ഭാവിയെ സ്വാധീനിക്കും. കാത്തിരുന്ന് കാണാം. 

പക്ഷെ ആ സ്ഥാപനം കൊണ്ട് കേരളത്തിന് ഗുണമുണ്ടായിട്ടില്ല എന്ന് യുക്തിസഹമായി ചിന്തിക്കുന്ന ആരും -- യുഡിഎഫ് എംഎൽഎമാർ അടക്കം -- പറയുമെന്ന് തോന്നുന്നില്ല. 223 റോഡുകൾ, 91 പാലങ്ങൾ, 57 റെയിൽവേ മേൽപ്പാലങ്ങൾ, 15 ഫ്ലൈ ഓവറുകൾ, ഒരു അടിപ്പാത എന്നിവയൊക്കെ 18,445 കോടി രൂപ ചെലവഴിച്ച് നിർമ്മിച്ചത് കിഫ്ബി വഴിയാണ്. ദേശീയപാതയുടെ ഭൂമി ഏറ്റെടുക്കലിന് കേന്ദ്ര സർക്കാർ ആവശ്യപ്പെട്ട 6769 കോടി രൂപയിൽ സംസ്ഥാന സർക്കാർ നൽകിയ 5580 കോടി രൂപയും കിഫ്ബി വഴി നൽകിയതാണ്. എല്ലാ നിയമസഭാ മണ്ഡലങ്ങളിലും ഐസൊലേഷൻ വാർഡ്, 10 ആശുപത്രികൾക്ക് പുതിയ കാത്ത് ലാബുകൾ, 44 ജനറൽ ആശുപത്രികളിൽ പുതിയ ഡയാലിസിസ് കേന്ദ്രങ്ങൾ, ഹൈടെക് ആക്കിയ 44,705 ക്ലാസ് മുറികളും 11,257 സ്കൂൾ ലാബുകളും, 268 സ്കൂൾ കെട്ടിടങ്ങൾ, കെ-ഫോൺ പദ്ധതി ഇവയെല്ലാം കിഫ്ബി മുഖാന്തിരം നിർമ്മിച്ചവയാണ്. കേരളത്തിലെ സ്കൂളുകളുടെയും ആശുപത്രികളുടെയും ലോകോത്തര നിലവാരത്തിലേക്കുള്ള നവീകരണം സമൂഹത്തിലെ ഏറ്റവും അടിത്തട്ടിലുള്ള അടിസ്ഥാന വർഗ്ഗങ്ങൾക്കാണ് ഗുണം ചെയ്തിട്ടുള്ളത് എന്നത് വിസ്മരിക്കാൻ കഴിയുമോ? ഈ നേട്ടങ്ങളെല്ലാം അവിടെ നിൽക്കുക തന്നെ ചെയ്യും. വാസ്തവം ഇതായിരിക്കെ "അച്ഛൻ്റെ കീശയിൽ നിന്നും പണം എടുത്ത് ചിലവാക്കുന്നു" എന്നൊക്കെ പറഞ്ഞ് സർക്കാരിനെ പരിഹസിക്കുന്നവർ സ്വയം പരിഹാസപാത്രമാവുകയാണ്. അത്ര തന്നെ. 

ഈ പരമ്പരയുടെ അവസാനമെത്താറായി. ഒന്നോ രണ്ടോ വിഷയങ്ങൾ മാത്രമേ ബാക്കി നിൽക്കുന്നുള്ളൂ എന്ന് തോന്നുന്നു. അത് അടുത്ത തവണയാകാം.